Эрдэх щёнҗуонни мангәчўр җондисы люфу. Җыгә лошы гынди фу ман тан, ман ва дэ мый йиҗязыди йүанзыни җондини, ги хўрҗяму ги да лийидини. Тиче җыгә фу, Ясыр Шывазы фәсы:
Җыгә ван фу би сан го,
Йичў ху мын
Вә щян ба та канҗянни
Зыю та чин…
Нан Я. Шывазыди хуа, люфу – җысы щинэди щёнҗын. Ба тади нунмянди лю җыҗыр щёхуәр ги щинэди гўнён дуандини. Йинви нэгә чуанлянжынму вонщёнди гуә йигә «люфу» либянди җүнмый фестивальни. Җыгә фу зэ Эрдэх щёнҗуонни җонди йимяр, зу зэ җытар гуәли бисэли.
Чунтянди линйир… Бынди щёнҗуонниди Юсуф Хазрет минщя щүәтонниди щүәсынму жынбучўди дынли җыгә җечили. Цанҗя бисэди ваму щянли зыҗиди бынсыли, таму литуди мый йигә вонщёнди йин йигә шонхони.
12 дян җун. Жёйүанму, цанҗяжынму дэ кижыңму монмонди вон йүндунтинзы литу җинтуәли. Ё фәни, җыгә да тинзыди чён готу гуадисы Эрдэх дэ Конкино щүәтонниди щүәсынму шелү бянйиди цэлё: җочў тиму хуахади заён хуарҗонзы, щёнпяр, зыҗи зўхади гәён дунщи, билүн, на люфу тёзы бянхади куонзы, зўхади цу дэ хуэйзўди вуку чыди. Вәму щищир канли бэхади цэлёли.
Җысыма, Райха Харсановна Юсупова ба хуэй кэкэли. Ба цанҗяжынму гунщилиди йиху, та ба хуа ги щүәтонниди щүәҗон Юсупова З. Х. жонгили. Зебера Харсановна ба даҗя лян лэди кижынму жыншыли – җысы да Бишкек чынни лэди чуанлянжынму Алмакучуков К. М. дэ Юсурова З. Г., куәщүәжынму Макеева Ф. Х., Джон А. А., Машинхаева Ф. Х., Хырхыз Республикади хуэймин щехуэй Советди линшу Машанло А. Л., Хырхыз Республикади Минжынди чонҗя Молдокулова Э. М., шехуэйди дэ җёмынди нынйүан Лома Ю. Я.
Нан тади хуа, җыгә фестиваль ю да чин-юни, йинцысы җыму дади бисэ туфын-тузы зэ Эрдэх щүәтонни гуәдини. Зэмусы тади тиму е за, шонхо есы җычянди. Йинви җыгә щүәсынму җынщин, гого-щинщинди, танщинди ги җыгә бисэ шелүли, до вамушон – җысы йигә щихуан сычин дэ жәно җечи. Ба хуа җёнба, бисэ дали турли.
Ту йигә бисэсы «Санжыра» - җысы мый йи җязыди зўзў-быйбый, чинчин-лўҗянди лянщи, җящяди гын. Ги җыгә бисэшон бэчўлэли манли шыгә ваму шелүхади хуә. Ба йиче цэлё канба, жюри җянчўлэли сангә дин ходи хуә. Ба ту йигә вифын Юсупов Малик җаншонли, ди эргә вифын Конкино щүәтон дыйшонли, ди сангә вифын Сбазиев Алишер җаншонли.
Ё фәни, ба ту йигә дэ ди эргә вифынди шонхо СААМ (CENTRAL ASIA-ART MANAGEMENT) шелү бянйили – җысы планшет дэ җичи. Ба ди сангә вифынди (1000 сом) дэ данлин цутэди шонхо Җын Хэ минщяди шехуэй гунйүнгили. Хуэймин щехуэй е ба зыҗиди шонхо налэли – җысы Минйү грамота дэ заён фу. Макеева Ф. Х. ги тёха тёвуди щүәсынму ба Хусэ Маке щехади сывын фу дуангили. Ги йигә щүәсын Юсуров Рамзес та дуали 500 сом.
Ди эргә бисэсы «Замуҗя вә җыдо зыҗиди щёнҗуонни». Нан тиму щүәсынму щели зуәвынли. Җёйүанму ги жюриди шуни җёгили 15 на вурус, хуэйзў дэ хырхыз хуа щехади зуәвын. Жюри ба вамуди зуәзо цаканлиди йиху, ба сангә дин ходи хуә җянчўлэли. Җыгә бисэшонди дыйшынҗясы:
- Ливазов Малик (на хуэйзў йүян щехади зуәвын);
- Асанкадырова Бермет (на хырхыз йүян щехади зуәвын);
- Савоськина Полина (на вурус хуа щехади зуәвын).
Ди сангә бисэсы «Люфу» либян хуарҗонзы дэ щёнпяр. Канлэни, щүәсынму щинҗин фишон ганли җыгә хуәли: чоншон бяди заён люфу хуар дэ щёнпяр жо жын няндини. Кәсы заму бан еба, ба таму җунҗянниди дин ходи цэлё ё җянчўлэни. Шонлёнлиди йиху жюри җянчўлэли сангә хуә.
- Баратова Хуршида;
- Шабазова Мадина;
- Наншанло Алия.
Ди сыгә бисэди тимусы «Сўчон сынхуә литуди чигуэ сычин». Җочў зыҗиди җешу щүәсынму җоли щёнпярли. Ё фәни, җымуҗяди цэлё е бу дуә. Йинви нэгә жюри мә танман ба жун-ё хуә җянчўлэли.
Калимова Малика ба ту йигә вифын җаншонли. Идрисов Санжарсы ди эргә. Лягазов Ильяс ба ди сангә вифын җаншонли. Таму гого-щинщинди җешули шонхоли.
Зэ ди сыгә бисэшон щүәсынму нянли хуэйзў сыҗя дэ Алыкул Осмонов либянди сывынли. Лёнгә щүәтонниди шы люгә щүәсынму ви шонхо йиҗя лян йиҗя да пинпинли. Тамуди җунҗянни сангә щүәсын ба шонхо дыйшонли. Дин суйди цанҗяжын, нян вуходи щүәсын Джумаев Абдумалик ба ту йигә вифын җаншонли. Та нянли А. Осмоновди сывынли. Сывын нян ходи йимяр, жюри ги та пыйли шули, ба щүхади планшет дуангили. Мамиева Алина ги даҗя нянли Ясыр Шывазыди «Люфу» сывынли, та йинли йигә шуҗи. Цеахунов Эмиль ба ди сангә вифын җаншонли, ги та дуанли йигә фу.
Линйирди бисэшон җёйүанму цанли җяли. Ба җыгә бисэ нын җёчын «Шон конди цэфын, ха конди чўзы». Багә нянчин җёйүан зэ даҗяди мянчян щянли зў чыдиди бынсыли: чели цэли, щүәли цэфули зэмусы ба бянйи чыди е бэшонли. Нан вәди йиҗян, җысы дин жәноди йигә пинпин. Ё фәни, җыгә бисэшон дин малиди дэ шудуан годисы Мафкуева Римма, та ба ту йигә вифын җаншонли. Сбазиева Амина ба ди эргә вифын җаншонли. Даутова Зарина ба ди сангә вифын дыйшонли. (CENTRAL ASIA-ART MANAGEMENT) ги таму ба җяни сыйүнди дунщи дуангили.
Чўгуә җун-ё бисэ зэ җыгә җүнмый банфашон щүәсынму хан чонли шутин чүзыли, тёли тёвули. Щижын Молдокулова Е.М. е чонли лёнгә жәно чүзы. Зу җымуҗя мә җүәлэ сыхур е гуәли.
Мәю шанки, җыгә җүнмый җечи шындо мый йигә цанҗяжынмуди щиннини, йинцы җысы вон йидарни лалян жынмуди банфа, та ги чиннян дуан гощиндини, ба тамуди щинҗин вон гони тидини. Зэмусы хо сыюр зущён чёр…
Фатима Машынхаева,
Эрдэх щёнҗуон .
Хуадян :
Щёнҗын – символ
Бисэ – конкурс
Йүндунтинзы – спортивный зал
Чуанлянжын – организатор
Цутэди шонхо - поощрительный приз
Зуәвын – сочинение
Сўчон – обычный
Чигуэ – удивительный
Җешу – восприятие
Да пинпин – соревноваться
Шудуан – умение, мастерство
Банфа – мероприятие.
